O‘zbekiston Respublikasining Vashington shtatidagi Bosh konsulxonasi jamoasi Asia Society Seattle tashkiloti tomonidan tashkil etilgan uchrashuvda ishtirok etdi.
Bosh konsulxona delegatsiyasini samimiy kutib olgani hamda mazmunli muloqot uchun yuksak darajadagi platforma yaratgani uchun Asia Society Seattle tashkiloti, uning ijrochi direktori Margaret Conley va tashkilotning hurmatli a’zolariga chuqur minnatdorlik bildirildi.
Uchrashuv davomida ishtirokchilarga zamonaviy O‘zbekiston, mamlakatimizda so‘nggi o‘n yildan kam vaqt ichida amalga oshirilgan keng ko‘lamli o‘zgarishlar hamda erishilgan muhim natijalar haqida batafsil ma’lumot berildi.
O‘zbekistonda amalga oshirilayotgan izchil islohotlar, iqtisodiyotning ochiqligi, xususiy sektorni qo‘llab-quvvatlash va innovatsiyalarni rivojlantirishga qaratilgan siyosat natijasida mamlakat xalqaro hamjamiyat bilan faol hamkorlik qiladigan ishonchli, qat’iyatli va istiqbolga intiluvchi sherikka aylangani ta’kidlandi.
O‘zbekistonning bugungi tashqi iqtisodiy siyosati xalqaro hamkorlikni kengaytirish, bilim va ilg‘or tajriba almashish, investitsiyalarni jalb qilish hamda barqaror iqtisodiy o‘sish uchun yangi imkoniyatlar yaratishga yo‘naltirilgani qayd etildi.
Erishilgan yutuqlar mamlakat taraqqiyotining yakuniy manzili emas, balki yanada ulkan maqsad va tashabbuslar uchun mustahkam poydevor sifatida ko‘rilishi alohida ta’kidlandi. Dunyo bo‘ylab, jumladan, AQShning Tinch okeani shimoli-g‘arbiy hududidagi hamkorlar bilan aloqalarni mustahkamlash xalqlarimiz uchun uzoq muddatli manfaatlar yaratishi va umumiy farovonlikka xizmat qilishi qayd etildi.
Tadbir doirasida O‘zbekistonning iqtisodiy salohiyati, investitsiyaviy muhiti, xalqaro munosabatlari va mintaqadagi o‘rni yuzasidan atroflicha fikr almashildi.
Bosh konsulxona Asia Society Seattle tashkilotiga samimiy mehmondo‘stlik, mazmunli muhokama va O‘zbekistonga bo‘lgan chinakam qiziqishi uchun yana bir bor minnatdorlik bildirib, uzoq muddatli va mustahkam sheriklikni rivojlantirishga tayyorligini bildirdi.
